ភ្នំពេញ៖ នាយករដ្ឋមន្ត្រី សម្ដេចធិបតី ហ៊ុន ម៉ាណែត បានផ្ញើលិខិតរម្លែកទុក្ខចំពោះមរណភាពរបស់អតីតនាយករដ្ឋមន្ត្រីចិនលោក លី ឃឺជាំង ដែលបានទទួលមរណភាពដោយជំងឹគាំងបេះដូង នៅទីក្រុងសៀងហៃ ព្រឹកថ្ងៃទី២៧ ខែតុលា ឆ្នាំ២០២៣នេះ។

ក្នុងលិខិតរម្លែកទុក្ខផ្ញើជូននាយករដ្ឋមន្ត្រីចិន សម្ដេចធិបតី ហ៊ុន ម៉ាណែត បានចាត់ទុកការបាត់បង់លោក លី ឃឺជាំង គឺជាការបាត់បង់អ្នកនយោបាយដ៏សំខាន់មួយរូបនៃរដ្ឋប្រជាមានិតចិនដែលលោកបានលះបង់កម្លាំងកាយចិត្តចំពោះស្ថិរភាពនៃប្រទេស។

ជាមួយគ្នានេះសម្ដេចធិបតីក៏បានរម្លឹកពីដំណើរទស្សនកិច្ចរបស់លោក លី មកកាន់កម្ពុជាក្នុងឆ្នាំ២០១៨ និង២០២២ផងដែរដែលបានចុះហត្ថលេខាលើកិច្ចព្រមព្រៀងជាច្រើនជាមួយកម្ពុជា។

សម្ដេចថា៖ «ឯកឧត្តម លី នឹងនៅតែត្រូវបានចងចាំថាជាមិត្តរបស់កម្ពុជាជារៀងរហូត»។

គួរឱ្យដឹងផងដែរអតីតនាយករដ្ឋមន្ត្រីចិនលោក លី ឃឺជាំង បានទទួលមរណភាពនៅអាយុ៦៨ឆ្នាំ នៅពាក់កណ្ដាលយប់ថ្ងៃព្រហស្បតិ៍ចូលថ្ងៃសុក្រ ទី២៧ ខែតុលានេះ ដោយសារការគាំងបេះដូង។ លោកបានកាន់តំណែងជានាយករដ្ឋមន្ត្រីនៃសាធារណរដ្ឋប្រជាមានិតចិនពីឆ្នាំ២០១៣ រហូតដល់ខែមីនា ឆ្នាំ២០២៣៕